Beynəlxalq elmi-praktiki konfrans keçirilmişdir

12 may 2016-cı il tarixdə Gəncə Dövlət Universitetində Ümummilli lider Heydər Əliyevin anadan olmasının 93-cü ildönümünə həsr olunmuş “Müasir kimya və biologiyanın aktual problemləri”  mövzusunda  beynəlxalq elmi-praktiki konfrans keçirilmişdir. Dahi rəhbərin  vurğuladığı “Dünyada gedən əsas tərəqqinin təməlində elm dayanır.” ifadəsini əsas tutan Universitet kollektivi elmi-tədqiqatların geniş şəkildə aparılmasına ciddi önəm verir. Bu baxımdan da digər ölkələrin alimlərinin yaradıcılığı ilə tanışlıq və  qarşılıqlı əlaqələrin yaradılması üçün  Beynəlxalq konfransların keçirilməsi artıq bir neçə ildir ənənəyə çevrilmişdir.

Konfrans iştirakçıları əvvəlcə görkəmli dövlət xadimi Heydər Əliyevin abidəsini ziyarət edərək, böyük ehtiram əlaməti olaraq önünə gül dəstələri qoymuşlar. Möhtəşəm Heydər Əliyev parkında ucaldılmış Heydər Əliyev mərkəzinin iclas zalında təşkil edilmiş konfransda 300-ə yaxın iştirakçıdan  qardaş Türkiyə, Rusiya və Gürcüstanın , eləcə də Respublikamızın ali məktəblərinin, elmi-tədqiqat institutlarının 11 nəfər xarici ölkə alimi olmaqla  80-dən yuxarı nümayəndəsi, o cümlədən , bir nəfər akademik, 4 nəfər akademiyanın müxbir üzvü iştirak etmişdir.

Azərbaycan Respublikasının himni ilə açılışı elan olunan Plenar iclasında ilk öncə  Gəncə şəhər İcra Hakimiyyətinin İctimai-siyasi və humanitar məsələlər şöbəsinin müdiri professor Sevda Qurbanəliyeva  iştirakçıları salamlamış və Azərbaycan elminə böyük töhvə verəcək konfransın işinə uğurlar diləmişdir.

Gəncə Dövlət Universitetin rektoru professor Yusif Yusibov 4000 min ildən çox tarixi olan qədim Gəncəyə gəlmiş alimlərə səmimi sözlərini bildirdi. Qeyd etdi ki, müasir Azərbaycan dövlətinin memarı və qurucusu olan Ulu Öndər hər sahədə olduğu kimi, təhsilimizin, elmimizin inkişafına da böyük qayğı ilə yanaşırdı. İstər sovet hakimiyyəti illərində, istərsə də müstəqillik dövründə elm siyasəti milli quruculuq siyasətinin əsas istiqamətlərindən birini təşkil edib. Heydər Əliyev elmə, alimə həmişə yüksək qiymət verirdi. Ulu öndərin elmə göstərdiyi həssas münasibət, alimlərimizə verdiyi mənəvi stimul onları yeni-yeni nailiyyətlərə ruhlandırıb. O, elmi məsələlərin həllində yüksək peşəkarlıq göstərirdi. Bunun ilk səbəbi onun özünün də elmi təfəkkürə sahib olması, intellektual potensiala arxalanması idi.

Dahi rəhbərin sadiq davamçısı cənab Prezidentimiz İlham Əliyevin, Gəncə şəhər İcra Hakimiyyətinin başçısı hörmətli Elmar Vəliyevin qayğısı nəticəsində əsası 1938-ci ildə qoyulmuş  Universitetimiz günü-gündən inkişaf edir, beynəlxalq əlaqələri durmadan genişləndirir. Bu günki konfrans da buna gözəl bir nümunədir.

Azərbaycan Respublikası Təhsil Nazirliyinin Lisenziyalaşdırma və akkreditasiya sektorunun baş məsləhətçisi Əfqan Abdullayev Azərbaycan təhsilinin uğurlarından, son islahatlardan danışmaqla bərabər, qeyd etdi ki, ali təhsil ocaqları əsasən məzunları və elmi nailiyyətləri ilə tanınır. Təhsilin səviyyəsinə və elmi tədqiqatlarına görə Gəncə Dövlət Universitetinin də qabaqcıl universitetlərdən biri olduğunu vurğuladı. Akreditasiya zamanı məlum olmuşdur ki, universitetin uğurlarından ən başlıcası alimlərinin müvəffəqiyyətli elmi axtarışları, dünyada tanınmış, nüfuzlu jurnallarda nəşr olunmalarıdır. Bu günki Beynəlxal elmi-praktiki konfransı da o uğurlardan biri hesab etmək olar.

Kimya elmləri doktoru, professor, AMEA-nın Gəncə bölməsinin sədri, AMEA-nın həqiqi üzvü Fuad Əliyev qeyd etdi ki, qədim Gəncə əsrlərlə olduğu kimi bu gün də Azərbaycan elminin beşiyi sayılan şəhərlərdəndir. Hal-hazırda 100-dən çox elmlər doktoru, 700-ə yaxın fəlsəfə doktoru fəaliyyət göstərir. Gəncədə ciddi quruculuq işləri aparılır, yeni-yeni sənaye obyektləri yaradılır. Bu sahələrin daha da inkişafı məhz elmi axtarışlara söykənir. Gəncə Dövlət Universiteti də həmişə ön sırada addımlamış, bu gün də elmi bəhrəsi ilə şəhərimizin hərtərəfli inkişafına öz töhfəsini verəcəkdir.

Plenar iclasında  kimya elmləri doktoru, professor,  Azərbaycan Milli Elmlər Akademiyasının həqiqi üzvü, AMEA-nın akademik Yusif Məmmədəliyev adına Neft-Kimya Prosesləri İnstitutunun direktoru, akademik Vaqif Abbasovun “Azofos gübrəsinin çöl sınaqlarının nəticələri”, AMEA-nın müxbir üzvü Məhəmməd Babanlının “Topoloji izolyator xassəli qeyri-üzvi materialların kimyası”, V.L. Komarova adına Botanika İnstitutundan biologiya elmləri doktoru Sıtin Andrey Kirilloviçin “Qafqazın birillik gəvənləri:təkamülü və taksomaniyası”, Botanika kafedrasının müdiri, professor, Əməkdar elm xadimi Vaqif Novruzovun “Azərbaycan şibyələrinin tibbi-bioloji və kosmetik xüsusiyyətləri, istifadə olunma perspektivləri” mövzusunda çıxışları maraqla dinlənilmişdir.

Beynəlxalq elmi-praktiki konfrans bölmə iclaslarında davam etdirilmişdir.

 

 

 

 

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir