GƏNCƏ STARTAP GÜNLƏRİ YARIŞMASININ QALİBİ OLAN TƏLƏBƏLƏRLƏ GÖRÜŞ KEÇİRİLİB

Gəncə Dövlət Universitetinin İnnovasiyalar Departamentində Gəncə Startap Günləri yarışmasının qalibi olan tələbələrlə görüş keçirilib. Elm və İnnovasiyalar üzrə prorektor Pərvin Kərimzadə, Biologiya-Kimya Fakültəsinin dekanı İsfəndiyar Alverdiyev və İnnovasiyalar Departamentinin direktoru Vasif Həsənov tələbələri təbrik edib. Qeyd edilib ki son dövrlər ölkəmizin bir çox yerində olduğu kimi Gəncə Dövlət Universitetində də innovasiya və startap mövzularına xüsusi diqqət ayrılır və bu sahənin inkişafı üçün mütəmadi olaraq təlimlər, seminarlar və yarışmalar təşkil olunur. Bu diqqətin nəticəsidir ki, yarışda iştirak edən Gəncə Dövlət Universitetinin Biologiya-Kimya fakültəsinin tələbələrindən ibarət startap komandası 1-ci yerə layiq görülüb.

Startap Günləri 17 -18 may 2019-cu il tarixdə Gəncədə Azərbaycan Dövlət Aqrar Universitetində təşkil olunub. 2 gün davam edən tədbirdə Azərbaycan Dövlət Aqrar Universiteti, Gəncə Dövlət Universiteti və Azərbaycan Texnologiya Universitetinin tələbələri iştirak ediblər. Yarışda iştirak edən Gəncə Dövlət Universitetinin Biologiya-Kimya fakültəsinin tələbələrindən ibarət startap komandası 1-ci yerə layiq görülüb.

Qeyd edək ki Startap Günləri Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliynin dəstəyi ilə Startap Azərbaycan-ın təşkilatçılığı ilə keçirilir. Layihəyə Azərbaycan Beynəlxalq Bankı və SİNAM şirkəti dəstək verir.